ഊർജ്ജരംഗത്ത് വിപ്ലവകരമായ മുന്നേറ്റവുമായി ജപ്പാൻ. വായുവിൽ നിന്ന് നേരിട്ട് പെട്രോൾ, ഡീസൽ, ജെറ്റ് ഇന്ധനം എന്നിവ നിർമ്മിക്കാനാകുന്ന സിന്തറ്റിക് ഇന്ധന സാങ്കേതികവിദ്യ വികസിപ്പിച്ചിരിക്കുകയാണ് ജാപ്പനീസ് ഊർജ്ജ കമ്പനിയായ ENEOS.
ഡയറക്ട് എയർ ക്യാപ്ചർ (DAC) സാങ്കേതികവിദ്യ ഉപയോഗിച്ച് അന്തരീക്ഷത്തിൽ നിന്നുള്ള കാർബൺ ഡൈ ഓക്സൈഡ് ശേഖരിക്കുന്നതാണ് ആദ്യഘട്ടം. തുടർന്ന് പുനരുപയോഗ ഊർജ്ജം ഉപയോഗിച്ച് വെള്ളത്തിൽ നിന്ന് വേർതിരിച്ചെടുത്ത ഹൈഡ്രജനുമായി ഇത് സംയോജിപ്പിച്ച് ദ്രാവക ഹൈഡ്രോകാർബണുകളാക്കി മാറ്റുന്നു. ഇതിലൂടെ നിലവിലെ പെട്രോൾ, ഡീസൽ എൻജിനുകളിൽ യാതൊരു മാറ്റവും വരുത്താതെ തന്നെ ഉപയോഗിക്കാവുന്ന ‘ഡ്രോപ്പ്-ഇൻ’ ഇന്ധനങ്ങൾ സൃഷ്ടിക്കാനാകുമെന്നാണ് കമ്പനി പറയുന്നത്.
ഇന്ത്യയെ സംബന്ധിച്ച് ഈ സാങ്കേതികവിദ്യ വലിയ സാധ്യതകളാണ് തുറക്കുന്നത്. രാജ്യത്തിന്റെ ഊർജ്ജ ആവശ്യകതയുടെ ഭൂരിഭാഗവും ഇപ്പോഴും എണ്ണ ഇറക്കുമതിയെയാണ് ആശ്രയിക്കുന്നത്. സിന്തറ്റിക് ഇന്ധനം വ്യാപകമായി ഉൽപ്പാദിപ്പിക്കാൻ സാധിച്ചാൽ ഇറക്കുമതി ചെലവ് കുറയ്ക്കാനും ആഗോള എണ്ണവില ചാഞ്ചാട്ടങ്ങളിൽ നിന്ന് സംരക്ഷിക്കാനും ഇന്ത്യയ്ക്ക് കഴിയും.
അതേസമയം, വാണിജ്യാടിസ്ഥാനത്തിൽ ഈ സാങ്കേതികവിദ്യ വ്യാപിപ്പിക്കുന്നത് വലിയ വെല്ലുവിളിയാണ്. ഉയർന്ന ഉൽപ്പാദനച്ചെലവും വൻ നിക്ഷേപ ആവശ്യകതയും ഇപ്പോഴും പ്രധാന ആശങ്കകളായി തുടരുന്നു.