ഇന്ത്യയിലെ ആദ്യ എസ്.എം.എ. ചികിത്സയ്ക്ക് കേരളം മാതൃകയായി. സ്പൈനല്‍ മസ്‌കുലാര്‍ അട്രോഫി (എസ്.എം.എ.) എന്ന രോഗം ബാധിച്ച കുഞ്ഞിന് ജനിച്ച് ദിവസങ്ങള്‍ക്കുള്ളില്‍ തന്നെ പ്രീ സിംപ്റ്റമാറ്റിക് ചികിത്സ നല്‍കിയിരിക്കുകയാണ് കേരളം. എസ്.എം.എ ബാധിക്കാനുള്ള സാധ്യത മുൻകൂട്ടി തിരിച്ചറിഞ്ഞ്, കുഞ്ഞിന് ആദ്യ ലക്ഷണങ്ങള്‍ പ്രകടമാകുന്നതിന് മുന്‍പ് തന്നെ മരുന്ന് നല്‍കി നടത്തിയ ചികിത്സ വിജയകരമായി. ഇത് രാജ്യത്തിൻ്റെ അപൂര്‍വ രോഗ പരിചരണരീതികളിൽ ഒരു വിപ്ലവമാണ്.
തിരുവനന്തപുരം സ്വദേശിയായ ദമ്പതികളുടെ രണ്ടാമത്തെ കുഞ്ഞിനാണ് ഈ അപൂര്‍വരോഗത്തിനുള്ള വിലയേറിയ റിസ്‌ഡിപ്ലം മരുന്ന് സൗജന്യമായി നല്‍കിയത്. ഇവരുടെ ആദ്യ കുട്ടിക്ക് എസ്.എം.എ സ്ഥിരീകരിച്ചതിനാല്‍ കുഞ്ഞിൻ്റെ അമ്മയാണ് ഗര്‍ഭകാലത്ത് തന്നെ അടുത്ത കുഞ്ഞിനും ഇതേ രോഗം ബാധിക്കാനുള്ള സാധ്യത മനസ്സിലാക്കി സഹായത്തിനായി സര്‍ക്കാരിനെ സമീപിച്ചു. ആരോഗ്യമന്ത്രി വീണാ ജോര്‍ജ് ഇക്കാര്യം ഗൗരവത്തോടെ പരിഗണിച്ചു. തുടർന്ന്, ചൈല്‍ഡ് ഹെല്‍ത്ത് നോഡല്‍ ഓഫീസറുടെ നേതൃത്വത്തില്‍ എസ്.എ.ടി ആശുപത്രിയില്‍ വൈദ്യപരിശോധനകളും തുടര്‍ചികിത്സയും നടന്നു.
രോഗതീവ്രത നിര്‍ണയിച്ച് വിദഗ്‌ധ സമിതികളുടെ ശുപാര്‍ശയനുസരിച്ച്, എസ്.എം.എ രോഗം ബാധിക്കാന്‍ സാധ്യതയുള്ള കുഞ്ഞിന് ‘റിസ്‌ഡിപ്ലം’ എന്ന അമൂല്യ മരുന്ന് സൗജന്യമായി നല്‍കി. വികസിത രാജ്യങ്ങളില്‍ മാത്രമായിരുന്നു ഇതുവരെ ഇത്തരം ചികിത്സ ലഭ്യമായിരുന്നത്. ഇപ്പോള്‍ കേരളം അതിന് രാജ്യത്തെ മാതൃകയായി മാറുകയാണ്.
ഇന്ത്യയില്‍ 7000 കുട്ടികളില്‍ ഒരാള്‍ക്ക് എസ്.എം.എ ഉണ്ടാകാനാണ് സാധ്യതയെന്ന് പഠനങ്ങള്‍ വ്യക്തമാക്കുന്നു. എസ്.എം.എ അടക്കമുള്ള അപൂര്‍വ രോഗങ്ങള്‍ക്ക് പ്രത്യേക പരിചരണത്തിനായാണ് കേരള സര്‍ക്കാര്‍ 2024ല്‍ ‘കെയര്‍ പദ്ധതി’ ആരംഭിച്ചത്. ഇതിന്റെ ഭാഗമായാണ് ഈ ചികിത്സ സാധ്യമായത്. പദ്ധതിയിലൂടെ ഇതുവരെ നൂറിലധികം കുട്ടികള്‍ക്ക് മരുന്നും ശസ്ത്രക്രിയയും ഉള്‍പ്പെടെ സൗജന്യമായി ലഭിച്ചിട്ടുണ്ട്.
അപൂര്‍വ രോഗങ്ങള്‍ക്ക് പരിചരണം സമഗ്രമാകണം എന്ന സര്‍ക്കാരിന്റെ സമീപനം കേരളത്തെ ആരോഗ്യരംഗത്ത് ദേശീയ തലത്തില്‍ കൈയ്യടി നേടുന്നതിലേക്ക് നയിക്കുന്നു.