ഇന്ത്യയുടെ എണ്ണ-വാതക വ്യവസായങ്ങളുടെ ഭാവിയെക്കുറിച്ച് സമഗ്രമായ പഠനങ്ങൾ നടത്താൻ പെട്രോളിയം പ്ലാനിംഗ് & അനാലിസിസ് സെൽ (PPAC) ഒരുങ്ങുന്നു. അതിനായി പെട്രോളിയം & പ്രകൃതി വാതക മന്ത്രാലയത്തിൻ്റെ ഔദ്യോഗിക ഡാറ്റാ ശേഖരണ ഏജൻസിയായ പിപിഎസി ഒരു കൺസൾട്ടിംഗ് സ്ഥാപനത്തെ നോളജ് പാർട്ണറായി നിയമിക്കാൻ തീരുമാനിച്ചിരിക്കുന്നു. അതിനായുള്ള എക്സ്പ്രഷൻ ഓഫ് ഇന്ററസ്റ്റ് (ഇഒഐ) മുന്നോട്ടുവെച്ചതായാണ് വിവരം.
ഊർജ്ജ പരിവർത്തനങ്ങളോടൊപ്പം ജൈവ ഇന്ധനങ്ങൾ, ശുദ്ധീകരിച്ച പെട്രോളിയം ഉൽപ്പന്നങ്ങളുടെ കയറ്റുമതി തുടങ്ങിയ വിവിധ വിഷയങ്ങളിൽ എണ്ണ-വാതക വ്യവസായത്തിന്റെ ഭാവിയുമായി ബന്ധപ്പെട്ട് പഠനങ്ങൾക്കായി നിരവധി അഭ്യർത്ഥനകൾ ലഭിക്കുന്നതായി പിപിഎസി അറിയിച്ചു. ഈ ആവശ്യങ്ങൾക്കനുസരിച്ച് പിപിഎസി നോളജ് പാർട്ണറുടെ സഹായം തേടുകയാണ്.
2002 ഏപ്രിലിൽ രൂപീകൃതമായ പിപിഎസി എണ്ണ-വാതക മേഖലയിലെ ഡാറ്റാ ബാങ്ക് സംരക്ഷിക്കുകയും, എനർജി മോഡലിംഗ്, POL ഡിമാൻഡ് പ്രവചനം, വിവിധ പഠനങ്ങൾ തുടങ്ങിയതിൽ സജീവ പങ്ക് വഹിക്കുകയും ചെയ്യുന്നു. സബ്സിഡികൾ നൽകുന്നതിനു പുറമേ, എണ്ണ, വാതക മേഖലയിലെ മാറ്റങ്ങൾ നിരീക്ഷിക്കുകയും വിശകലനം ചെയ്യുകയും മന്ത്രാലയത്തിന് അതിന്റെ ഉത്തരവാദിത്തങ്ങൾ നിർവഹിക്കുന്നതിന് ഉചിതമായ പിന്തുണ നൽകുകയും ചെയ്യുക എന്നതിൽ പിപിഎസി പ്രധാന പങ്കുവഹിക്കുന്നു.
ഇന്ത്യയിൽ ഓയിൽ, ഗ്യാസ്, പുനരുപയോഗ ഊർജ്ജ മേഖല എന്നിവയിൽ നിക്ഷേപം പ്രോത്സാഹിപ്പിക്കുന്നതിനും ആസൂത്രണം ചെയ്യുന്നതിനും, ആഗോള നിക്ഷേപകരുമായി ഇടപെടലുകൾ ഉറപ്പാക്കുന്നതിനും, നോളജ് പാർട്ണർ പിപിഎസിയെ സഹായിക്കും. കൂടാതെ, വിവിധ ഇന്‍ഡസ്ട്രി പരിപാടികൾ സംഘടിപ്പിക്കും. വിവിധ നയരൂപീകരണങ്ങളിലും മേഖലയുമായി ബന്ധപ്പെട്ട ത്രൈമാസ റിപ്പോർട്ട്, സമഗ്ര വാർഷിക റിപ്പോർട്ട് തുടങ്ങി നിരവധി പ്രസിദ്ധീകരണങ്ങൾ തയ്യാറാക്കുന്നതിനും പിപിഎസിയുടെ പങ്കാളിത്തമുണ്ട്.
2025-26 കാലയളവിലും അതിനുശേഷവും ആസൂത്രണം ചെയ്യുന്ന പഠനങ്ങളുടെ സ്വഭാവം കണക്കിലെടുക്കുമ്പോൾ, പിപിഎസിയുടെ നോളജ് പാർട്ണറിന് (കെപി) അഞ്ച് അംഗങ്ങളുടെ ഒരു ടീമിനെയാണ് ആവശ്യമെന്ന് പിപിഎസി പറഞ്ഞു.
ആഗോള എണ്ണ & വാതകം, ഊർജ്ജം, പുനർനിർമ്മാണ സാങ്കേതികവിദ്യ, ജൈവ ഇന്ധനം, ഹൈഡ്രജൻ സമ്പദ്‌വ്യവസ്ഥ എന്നിവയിൽ കുറഞ്ഞത് 7 വർഷത്തെ പ്രൊഫഷണൽ പരിചയവും എണ്ണ & വാതക, ഊർജ്ജ മേഖലയിൽ കുറഞ്ഞത് 3 വർഷത്തെ പരിചയവുമുള്ള ഒരു വിദഗ്ദ്ധൻ ഈ ടീമിൽ ഉൾപ്പെടും.
വിദഗ്ദ്ധനെ സഹായിക്കുന്നതിന്, എണ്ണ, വാതക, ഊർജ്ജ മേഖലയിൽ കുറഞ്ഞത് 2 വർഷത്തെ പരിചയവും സാങ്കേതികവിദ്യകൾ/പുനരുപയോഗ ഊർജ്ജ മേഖലയിലെ ആഗോള മികച്ച രീതികൾ, ഹൈഡ്രോകാർബണുകളുടെ ഡിമാൻഡ് സബ്സ്റ്റിറ്റ്യൂഷൻ, ഊർജ്ജ കാര്യക്ഷമത, ഇതര ഇന്ധനങ്ങൾ എന്നിവയിൽ വൈദഗ്ധ്യവും ഉള്ള മൂന്ന് സപ്പോർട്ട് അംഗങ്ങളും ഉണ്ടായിരിക്കും.