രാജ്യത്തെ ബാങ്ക് അക്കൗണ്ടുകളില്‍ സ്ത്രീകളുടെ പങ്കാളിത്തം വർധിക്കുന്നതായി റിപ്പോർട്ട്. അക്കൗണ്ടുകളിൽ പുരുഷന്മാരുടെ എണ്ണം സ്ഥിരമായി കൂടുതലാണെങ്കിലും കഴിഞ്ഞ 3 വർഷങ്ങളിലായി സ്ത്രീ പങ്കാളിത്തം വര്‍ധിച്ചുവരുന്നതായി കാണാം. ബാങ്ക് അക്കൗണ്ടുകളിൽ 39.2 ശതമാനവും സ്ത്രീകളുടേതാണെന്നും മൊത്തം നിക്ഷേപത്തിന്റെ 39.7 ശതമാനവും സ്ത്രീകളുടെ സംഭാവനയാണെന്നും
സ്റ്റാറ്റിസ്റ്റിക്‌സ് ആന്‍ഡ് പ്രോഗ്രാം ഇംപ്ലിമെന്റേഷന്‍ മന്ത്രാലയം പുറത്തുവിട്ട റിപ്പോർട്ടിൽ പറയുന്നു.
സ്ത്രീ പങ്കാളിത്തം ഏറ്റവും ഉയർന്നത് ഗ്രാമപ്രദേശങ്ങളിലാണ്. ഗ്രാമപ്രദേശങ്ങളിലെ ബാങ്ക് അക്കൗണ്ടുകളിൽ 42.2 ശതമാനവും സ്ത്രീകളുടെ അക്കൗണ്ടുകളാണ്.
2021-ല്‍ പുരുഷന്മാരുടെ ബാങ്ക് അക്കൗണ്ടുകളുടെ എണ്ണം 26.59 ദശലക്ഷമായിരുന്നു. അത് 2024-ല്‍ 115.31 ദശലക്ഷമായി വർധിച്ചു. ഇതേ കാലയളവില്‍ സ്ത്രീ അക്കൗണ്ടുകളുടെ എണ്ണം 6.67 ദശലക്ഷത്തില്‍ നിന്ന് 27.71 ദശലക്ഷമായി ഉയർന്നു.
അതേസമയം, ബിസിനസ്സ് രംഗത്തും സ്ത്രീ പങ്കാളിത്തം അതിവേഗം വർധിക്കുകയാണ്. ഏകദേശം 73% പേരും ഒരു സാമ്പത്തിക വർഷത്തിൽ ഏകദേശം 10 ലക്ഷം രൂപവരെ വരുമാനം നേടുന്നതായി കണക്കുകൾ പറയുന്നു. ഓരോ മേഖലകളിലെയും സ്ത്രീകളുടെ മുന്നേറ്റം ബാങ്ക് അക്കൗണ്ടുകളിലും പ്രതിഫലിക്കുന്നു.
