ഇന്ത്യയിലെ ഇലക്ട്രോണിക് സ്പോര്‍ട്സ് ബിസിനസ് വിപുലീകരിക്കുന്നതിന് റിലയന്‍സും ആഗോള ഇ-സ്പോര്‍ട്സ് സംഘടനയായ ബ്ലാസ്റ്റുമായി സഹകരിക്കുന്നു. ഇന്ത്യയിലെ ഇ-സ്പോര്‍ട്സ് ഇക്കോസിസ്റ്റം വികസിപ്പിക്കുകയാണ് ലക്ഷ്യം.
ലോകത്തിലെ ഏറ്റവും വലിയ ടൂർണമെൻ്റ് സംഘാടകരാണ് ഡെന്മാർക് ആസ്ഥാനമായ BLAST ApS ൻ്റെ ഉടമസ്ഥതയിലുള്ള ബ്ലാസ്റ്റ്. റിലയന്‍സും ബ്ലാസ്റ്റും ചേർന്ന് ഗെയിമിംഗ് വിപണിക്ക് അനുയോജ്യമായ പുതിയ ടൂര്‍ണമെൻ്റുകൾ സംഘടിപ്പിക്കുക വഴി കൂടുതല്‍ ഗെയിമര്‍മാരെയും സ്‌പോണ്‍സര്‍മാരെയും നിക്ഷേപകരെയും ഇന്ത്യന്‍ ഇ-സ്പോര്‍ട്സിലേക്ക് ആകര്‍ഷിക്കാൻ സഹായിക്കും. മാത്രമല്ല, ബ്ലാസ്റ്റിൻ്റെ ആഗോളതലത്തിൽ അംഗീകരിക്കപ്പെട്ട ഇ-സ്‌പോർട്‌സ് പ്രോപ്പർട്ടികളും പ്രൊഡക്ഷൻ ടെക്‌നിക്കുകളും ഇന്ത്യയിലേക്ക് കൊണ്ടുവരാനും സഹായകരമാകും.
ടെലി കമ്മ്യൂണിക്കേഷന്‍, മീഡിയ, എൻ്റർടെയ്ൻമെൻ്റ് ഉള്‍പ്പെടെയുള്ള വൈവിധ്യമാര്‍ന്ന ബിസിനസ് താല്‍പ്പര്യങ്ങള്‍ കണക്കിലെടുക്കുമ്പോള്‍, ഇ സ്പോര്‍ട്സ് വിപണിയിലേക്കുള്ള റിലയന്‍സിൻ്റെ പ്രവേശനം സ്വാഭാവികമാണ്. അതിനാൽ കമ്പനിയുടെ അനുബന്ധ സ്ഥാപനമായ ജിയോ ഇതിനകം തന്നെ ഡിജിറ്റല്‍ സാങ്കേതികവിദ്യകളിൽ ഗണ്യമായ നിക്ഷേപം നടത്തിയിട്ടുണ്ട്. ബ്ലാസ്റ്റുമായുള്ള പങ്കാളിത്തം, റിലയന്‍സിനെ ആഗോള ഇ-സ്പോര്‍ട്സ് ഓര്‍ഗനൈസേഷന്റെ വൈദഗ്ധ്യവും ശൃംഖലയും ഉപയോഗിച്ച് ഇന്ത്യന്‍ സ്പോര്‍ട്സ് വിപണിയില്‍ ശക്തമായ ചുവടുറപ്പിക്കാന്‍ സഹായിക്കും
