കൊച്ചി അന്താരാഷ്ട്ര വിമാനത്താവളത്തിൽ അഗ്നിശമന സേവനങ്ങൾക്ക് പുതിയ അധ്യായം തുറന്ന് സിയാൽ. സിയാൽ അഗ്നിശമനസേനയുടെ നവീകരണപ്രവർത്തനത്തിന്റെ ഭാഗമായി ഫയർഫൈറ്റിങ് റോബോട്ട്, ബൂംലിഫ്റ്റ് എന്നീ രണ്ട് അത്യാധുനിക അഗ്നിശമന ഉപകരണങ്ങളാണ് അവതരിപ്പിച്ചത്. സിയാൽ സെൻട്രൽ ബ്ലോക്കിൽ നടന്ന ഉദ്ഘാടന ചടങ്ങിൽ വ്യവസായ മന്ത്രി പി. രാജീവ് പുതിയ ഉപകരണങ്ങളുടെ പ്രവർത്തനം ഔദ്യോഗികമായി ആരംഭിച്ചു.
ആർട്ടികുലേറ്റഡ് ബൂം ലിഫ്റ്റും മൾട്ടി പർപസ് ഫയർ ഫൈറ്റിംഗ് റോബോട്ടുമാണ് നവീകരണത്തിന്റെ ഭാഗമായി അനാവരണം ചെയ്ത ഉപകരണങ്ങൾ. ഉയർന്ന സ്ഥലങ്ങളിലേക്കും കഠിനപ്രവർത്തന മേഖലകളിലേക്കും സുരക്ഷിതമായി പ്രവേശിച്ച് രക്ഷാപ്രവർത്തനം നടത്താൻ കഴിയുന്ന ആർട്ടികുലേറ്റഡ് ബൂം ലിഫ്റ്റിന് 28 മീറ്റർ ഉയരത്തിൽ വരെ പ്രവർത്തിക്കും. ഹൈഡ്രോളിക് സാങ്കേതിക വിദ്യയിൽ പ്രവർത്തിക്കുന്ന ഈ ഉപകരണം 250 കിലോഗ്രാം വരെ ഭാരം കയറ്റാനുള്ള ശേഷിയും വേഗതയും ഉള്ളതാണ്. അപകട സാധ്യത കൂടുതലുള്ള മേഖലകളിലേക്ക് ആളുകളെ അയക്കാതെ അഗ്നിശമന പ്രവർത്തനം നടത്താൻ കഴിവുള്ള മൾട്ടി പർപസ് ഫയർ ഫൈറ്റിംഗ് റോബോട്ട് സംവിധാനവും ശ്രദ്ധേയമാണ്. റിമോട്ട് നിയന്ത്രണ സംവിധാനമുള്ള ഈ റോബോട്ടിൽ ക്യാമറയുൾപ്പെടെ വിവിധ സംവിധാനങ്ങളുണ്ട്. 360 ഡിഗ്രിയിലും തീയണക്കാൻ ഈ റോബോട്ടിന് കഴിവുണ്ടെന്നത് അതിന്റെ പ്രധാന സവിശേഷതയാണ്.
ഉദ്ഘാടനച്ചടങ്ങിനോടനുബന്ധിച്ച് ഉപകരണങ്ങളുടെ പ്രവർത്തനപ്രദർശനവും നടന്നു. സിയാൽ മാനേജിംഗ് ഡയറക്ടർ എസ്. സുഹാസ് ഐ.എ.എസ്, സിയാൽ ഡയറക്ടർ വർഗീസ് ജേക്കബ്, എക്‌സിക്യൂട്ടീവ് ഡയറക്ടർമാരായ ജയരാജൻ വി, സജി കെ. ജോർജ്, എയർപോർട്ട് ഡയറക്ടർ മനു ജി, എ.ആർ.എഫ്.എഫ് ഹെഡ് സോജൻ കോശി, വിവിധ വകുപ്പ് മേധാവികൾ, ജീവനക്കാർ തുടങ്ങിയവർ ചടങ്ങിൽ പങ്കെടുത്തു.
സിയാൽ അധികൃതരുടെ നേതൃത്വത്തിലുള്ള അഗ്നിശമന സംവിധാനത്തിന്റെ സമഗ്ര നവീകരണ പദ്ധതിയുടെ ഭാഗമായാണ് ഈ ഉപകരണങ്ങൾ കെ.എസ്.ആർ.ടി.സിയുടെ സാങ്കേതിക സഹകരണത്തോടെ വികസിപ്പിച്ചത്. ഇതുവഴി കൊച്ചി വിമാനത്താവളത്തിലെ സുരക്ഷാ മാനദണ്ഡങ്ങൾ ആധുനികതയിലേക്കും കാര്യക്ഷമതയിലേക്കും ഉയരുമെന്നാണ് പ്രതീക്ഷ.